Biixi: 14 Milyan oo kamid ah 18 milyan oo ku baxaysa doorashada – Somaliland baa bixinaysa

Madaxweynaha Somaliland, Muuse Biixi Cabdi oo wareysi siiyay VOA-da ayaa sheegay in 80% ay ku guuleysatay Xukuumadda uu hoggaamiyo ballanqaadyadii uu ku galay tartanka doorashada 7 sano kahor.

Muuse Biixi oo mar kale ah musharraxa xisbiga KULMIYE ayaa xusay in maamulka uu hoggaamiyo ka gudbay caqabado culus oo lasoo gudboonaaday Somaliland, qeybtoodna ay la wadaagto dunida, sida cudurka COVID-19 iyo duufaano ka dhacay deegaanka.

“Saddex meelood oo baahi weyn loo qabay, mid walba miisaaniyadeedu in qaar 100% korortay, sida caafimaadka oo kale, waxbarashada 50% in kabadan ayay labalaabmatay, Biyaha iyaguna way labalaabmeen” ayuu yiri Biixi.

13 November [Arbacadda], ayaa shacabka Somaliland u dareeri doonaan doorashada isku sidkan ee Madaxtooyada iyo Ururrada siyaasadda – MW Biixi ayaa wajahaya loollan culus, iyadoo musharraxa xisbiga weyn ee mucaaradka “WADDANI”, Cabdiraxmaan Cirro uu helayo taageeradq in badan oo kamid ah siyaasiyiinta saameynta ku dhex leh Somaliland.

18 Milyan oo ku baxaysa doorashada, ayuu sheegay MW Biixi in 14 milyan oo kamid ah ay bixisay Somaliland, halka 4 milyan laga hela deeq bixiyayaasha caalamiga ah.

“Anigu waxaan ahay faras lasoo jirabay tobanaan sano, 40 sano ee u dambeeyay dadka waan hortaagnaa, xaalado walba oo dalka soo maray waan wada joognay. Marka bulshadu iyadoo maankeeda iyo miyirkeeda qabta ayay miisaamaysaa qofka ay dooranayso.”

In kabadan 30 sano oo uu jiray maamulka Somaliland, Xukuumadda Biixi ayaa noqotay middii wajahday jabhadihii ugu badnaa ee ka sameysma deegaanada maamulka. Biixi ayaa la xiriiriyay arrintaan go’aan adeegiisa siyaasadeed, maadama uu diiday soo jeedino ugu yimid dhinacyo uu arkayay in ay diidan yihiin gooni isu-taagga Somaliland.

Is afgaradka biyo badeedka ee uu la galay Itoobiya, ayuu ku sifeeyay mid kiro ah oo u damaanad qaadaya in maamulka Somaliland uu helo aqoonsi, isagoo xusay in marka loo Bedelo heshiis rasmi ah la horgeyn doono Baarlamaanka Somaliland, si dhaqangal uu u noqdo.