Cabasho iyo Codsi Ku Saabsan Sicirka Korontada Magaalada Boosaaso

Ku socota:-

• Mudane Saciid Cabdullaahi Deni, Madaxweynaha Dowladda Puntland.

• Mudane Ilyaas Cusmaan Lugatoor, Madaxweyne Ku-xigeenka Puntland.

• Mudane Cabdirisaaq Axmed Siciid, Guddoomiyaha Golaha Wakiillada Puntland.

Og: Wasiirka Tamarta iyo Khayraadka Biyaha Puntland.

Nuqul: Guddoomiyaha Gobolka Bari.

Nuqul: Duqa Magaalada Boosaaso
________________________________________
Mudane Madaxweyne.

Ujeeddo: Cabasho ku saabsan sicirka sare ee korontada iyo codsi ku aaddan dardar-gelinta adeegyada tamarta ee Boosaaso
Anigoo ku hadlaya magaca shacabka reer Boosaaso, waxaan halkan idiinkugu soo gudbinayaa cabasho culus oo ku saabsan qiimaha sarreeya ee adeegga korontada ee ay bixiso shirkadda Golis. Sicirka sare ee korontada wuxuu si toos ah u saameeyay nolosha maalinlaha ah ee bulshada, kobaca dhaqaalaha, horumarka ganacsiyada yaryar, iyo ilaalinta deegaanka.

Boosaaso oo ah laf-dhabarta dhaqaale ee Puntland, waxay u baahan tahay koronto la awoodi karo si loo xaqiijiyo horumarka bulshada iyo dhaqaalaha.

Waxaa la ogsoon yahay in Dowladda Isutagga Imaaraadka Carabta, gaar ahaan Emirate-ka Dubai, ay maalgelisay mashruuc tamar-qoraxeed ah oo loogu talagalay in lagu daboolo baahida koronto ee magaalada. Si kastaba ha ahaatee, mashruucaas wali si rasmi ah uma hawlgelin, taas oo keentay in bulshada aanay helin faa’iidadii laga filayay.

Waxaa dareen weyn laga qabaa in danaha shacabka Boosaaso aysan helin mudnaantii ay lahayd. Sidaas darteed, waxaan codsanaynaa in:

1. Shirkadda Golis lala xisaabtamo si loo yareeyo qiimaha korontada, loogana furo tartan xor ah shirkado kale oo bixiya adeegga tamarta.

2. Mashruuca tamarta qoraxda ee Boosaaso si degdeg ah loo dardar-geliyo loona hawlgeliyo, iyadoo lala xisaabtamayo cid kasta oo dib u dhigtay hirgelintiisa.

3. Xoojinta isla xisaabtanka hay’adaha dowladda ee ka shaqeeya tamarta iyo adeegyada aasaasiga ah.

Sidoo kale, waxaan si qoto dheer u bogaadinayaa dadaalka joogtada ah ee Dowladda Puntland ay ugu jirto la dagaalanka kooxaha argagixisada ah ee Daacish, iyo horumarinta ciidanka booliska Puntland, gaar ahaan tababarrada ka socda Kulliyadda Booliska ee Carmo.

Waxaan rajaynayaa in cabashadan si dhab ah loo qaadan doono, waxna laga qaban doono si kor loogu qaado nolosha dadka reer Boosaaso, loogana shaqeeyo horumar waara iyo cadaalad bulsho.
Wabilaahi Towfiiq.
________________________________________
By:
Abdikayf Bashir Farah
Chief Executive Officer, Somali Community Parents Association (SOCOPA)
Social Justice and Community Development Advocate
🎓 Education:
• Community Leadership Certificate, Newman University Birmingham – October 2022
• Postgraduate Diploma in Law and Leadership, SOAS University of London – September 2018
• B.Sc. (Hons) Public and Community Health, De Montfort University – July 2009
• Diploma in Computer Science, Niels Brock Copenhagen Business College – 2003
________________________________________
📬 Contact:
• Twitter: @abdikayf
• Email: abdikayf.farah@socopa.org.uk