Qatar oo dhex-dhexaadin ka wadda dagaalka Qasa ayaa sheegtay in ay Jimcihii u gudbisay ergayga Bariga Dhexe u qaabilsan Madaxweynaha dooran ee Maraykanka Donald Trump, Steve Witkoff, uguna faahfaahisay wada-hadalladii xabbad joojinta ee Qasa oo ay isla wadeen Masar iyo Maraykanka.
Kulanka oo ka dhacay Doha ayaa Ra’iisul Wasaare Shiikh Maxammed bin Cabdulrahman bin Jassim Al-Thani waxa uu Witkoff kala hadlay “”xaaladihii ugu dambeeyay ee gobolka, gaar ahaan dadaallada lagu doonayo in xabad-joojin lagaga gaaro Marinka Gaza”, ayay tiri wasaaradda arrimaha dibadda Qatar.
Horraantii bishaan, dhexdhexaadiyeyaasha ayaa bilaabay dadaal cusub oo lagu soo afjarayo dagaalka Gaza iyo sidii loo sii dayn lahaa tobonaan la haystayaal Israa’iiliyiin ah oo weli lagu haysto dhulka Falastiin.
Ilo-diblomaasiyadeed ayaa tilmaamay in uu sii kordhayo cadaadiska caalamiga ah ee lagu saarayo Xamaas iyo Israa’iil in ay heshiis ku gaaraan wadahadallada dadban ee socda.
Madaxweynaha Mareykanka Joe Biden ayaa Khamiistii sheegay in “horumar dhab ah laga gaaray” wadahadallada.
Trump ayaa uga digay Xamaas in sida uu hadalka u yiri ay arki doonto “naar” haddii aysan sii deyn maxaabiista ku harsan ka hor caleema-saarkiisa 20-ka Janaayo.
Laakiin dhowr falanqeeye ayaa aaminsan in ra’iisul wasaaraha Israa’iil Benjamin Netanyahu uu doorbidayo in heshiiska la gaaro marka uu talada la wareego Trump halkii la gaari lahaa maalmaha ugu danbeeya ee madaxtinimada Joe Biden.
Xigadho:-VOA.
Share this:
Discover more from Idil News
Subscribe to get the latest posts sent to your email.