Shirkii Baarlamaanka fadaraalka ah ee loo balansanaa maanta,ayaa baaqday,waxaana 2-Fariimood oo jahwareer dhaliyay oo loo kala diray Xildhibaanada
Kulankii maanta oo Arbaco loo balansanaa in Guddoomiyihii is casilay Maamed Shiikh Cismaan Jawaari uu ka jeediyo Fadhiga Baarlamaanka ayaa baaqday, iyadoo uu soo baxayo muran iyo is qab qabsi ka dhashay habka kulankaas loo qabanayo.
Farriimo iska soo horjeeda ayaa xalay loo kala diray Xildhibaanada, waxaana farriin ka timid dhanka howl wadeenadii horay u diri jiray farriinta ee Baarlamaanka ay ku wargeliyeen Xildhibaanada kulanka maanta oo arbaco ah iyo hadal jeedinta Guddoomiyihii hore.
Sidoo kale waxaa farriin kale markii dambe diray Sii hayaha Guddoomiyaha Baarlamaanka ahna Guddoomiye Kuxigeenka 1aad C/wali Muudey oo sheegay in aanu jirin kulan illaa amar dambe.
Arrintan ayaa hubaal la’aan iyo jahwareer cusub ka dhex dhalisay Xildhibaanada oo la sheegay inay la yaabeen farriimaha iska soo horjeeda, mar haddii la soo afjaray xiisadii taagneyd.
Xildhibaano ka tirsan Golaha Shacabka ayaa sheegay in C/wali Muudey uu ka soo horjeedo khudbada Jawaari uu ka jeedinayo kulanka iyo marka u horeysa furitaanka oo uu shir guddoominayo, bacdamaa Jawaari inta uusan is casilaad ku dhawaaqin uu kursiga shir guddoonka ku farriisanayo.
Guddoomiyaha is casilay Maxamed Cismaan Jawaari ayaa maanta la filayay in khudbadiisa is casilaad uu ka jeediyo Xildhibaanada, isla markaana uu halkaas ku soo dhamaado murankii iyo kala qeybsanaantii u dhaxeysay.
Kulamo lagu xalinayay muranka ka dhashay kulankan ayaa xalay ka dhacay Madaxtooyada, waxaana la sheegay in illaa maanta ay u dhow dahay in xal la gaaro, isla markaana maalinka berri oo Khamiis ah la qaban doono kulanka.
Share this:
Discover more from Idil News
Subscribe to get the latest posts sent to your email.