Madaxweyne Deni oo ballanqaaday dhismaha Maxkamadaha Dastuuriga iyo mida sare

Madaxweynaha Dowladda Puntland Mudane Siciid Cabdullaahi Deni, ayaa caawa kulan la qaatay Ururada Siyaasadda Puntland iyo Guddiga KMG ah ee Doorashooyinka Puntland, Kulanka ayaa ahaa is xogwareysi iyo dardargelinta Doorashada Goleyaasha deegaanka ee degmooyinka Puntland.

Wasiirka Wasaaradda Arrimaha Gudaha, Federaalka iyo Dimuqraadiyeynta Puntland Mudane Cabdi Faarax Juxa iyo Guddoomiyaha Guddiga KMG ah ee Doorashooyinka Puntland Mudane Cabdirisaaq Axmed Siciid, ayaa la wadaagay Kulanka Halka uu marayo diyaargarowga dhameystirka Doorashada Goleyaasha deegaanka ee degmooyinka Puntland.

Madaxda Ururada Siyaasadda Puntland ee Shirka ka qeybgalay, ayaa iyana Kulanka kusoo bandhigay aragtidooda iyo sida ay diyaar ugu yihiin in ay ka qeybgalaan Doorashada Goleyaasha deegaanka ee degmooyinka Puntland.

Madaxweynaha Dowladda Puntland Mudane Siciid Cabdullaahi Deni, oo ka jawaabaya soojeedinta Ururada Siyaasadda ayaa ku dhawaaqay in Dowladdu taageero dhaqaale la garab istaagayso Ururada Siyaasadda, Dowladda ayaa $10,000 howlgelinta koowaad siinaysa Ururkasta Iyadoo inta howsha Doorashada iyo ololaha socdona bil kasta Ururkasta lasiinayo $3,000 oo joogto ah.

Sidoo kale Madaxweynaha Dowladda Puntland ayaa la wadaagay Kulanka in uu soo magacaabayo Maxkamadda Sare iyo Maxkamadda Dastuuriga ah ee Puntland, si loo dhameystiro Waxyaabaha dhinaca Garsoorka ka khuseeya Doorashada hal qof iyo hal cod ee Goleyaasha deegaanka ee degmooyinka Puntland.

Kulanka waxaa ka qeybgalay Wasiirka Wasaaradda Arrimaha Gudaha,Federaalka iyo Dimuqraadiyeynta, Wasiiru Dowlaha Madaxtooyada, Wasiirka Cadaaladda iyo Arrimaha Diinta, Wasiirka Tamarta, Macdanta iyo Biyaha, La-taliyeyaal Madaxweyne iyo Saraakiil Madaxtooyo.

IDILNEWS