Madaxweyne Farmaajo oo ka hadlay Geerida Maxamed Qanyare Afrax

Madaxweynaha dowladda Federaalka ah ee Soomaaliya Maxamed C/llaahi Farmaajo ayaa ka tacsiyadeeyay geeridii ku timid Maxamed Qanyare Afrax oo horay u soo noqday Wasiir iyo Xildhibaan dowladdii KMG aheyd.

Madaxweyne Farmaajo ayaa sheegay in Marxuum Qanyare uu qeyb weyn ka soo qaatay dadaaladii dib u heshiisiineed ee dalka ka dhacay.

“Waxaan u tacsiyaynayaa qoyskii, qaraabadii iyo guud ahaan ummadda Soomaaliyeed ee uu ka geeriyooday Maxamed Qanyare Afrax. Marxuumku waxa uu qayb weyn ka soo qaatay dadaalladii dib u heshiisiineed ee dalka isaga oo noqday Wasiir & Xildhibaan ka tirsan Baarlamaanka Soomaaliya”ayaa lagu yiri qoraal la soo dhigay barta Twitter-ka Villa Somalia.

Madaxweyne Farmaajo ayaa Eebbe uga baryay Marxuumka inuu naxariistii Janno ka waraabiyo, qoyskiisa iyo dhammaan shacabka Soomaaliyeed ee uu ka geeriyoodeyna samir iyo iimaan ka siiyo.

Allaha u naxariistee Maxamed Qanyare Afrax ayaa ka mid ahaa Hoggaamiye kooxeedyadii siyaasadda ee dalka soo maray kaddib burburkii dowladdii dhexe, waxaana sanadihii u dambeeyay la sheegay in xanuuno kala duwan soo wajaheen, taasoo sabab u noqotay in sanadkii 2012 wixii ka dambeeyay inuu siyaasadda ka baxo.