Muxuu Farmaajo ka yiri Heshiiskii RW Rooble iyo Musharixiinta ?

Madaxweynaha muddo-xileedkiisu dhamaaday ee DFS Maxamed C/llaahi Farmaajo, ayaa soo dhaweeyay Heshiiska xalay dhexmaray Ra’iisul Wasaaraha Xukuumadda xil-gaarsiinta ah iyo Midowga Musharaxiinta.

Qoraal kasoo baxay Madaxtooyadda Villa Somalia ayaa lagu yiri “Madaxweynaha ayaa ku bogaadiyey Ra’iisul Wasaaraha XFS Mudane Maxamed Xuseen Rooble dadaalka uu ku bixiyey heshiiska wadajirka ah iyo guud ahaan maareynta arrimaha doorashooyinka iyo sida ay uga go’an tahay in la dhaqan geliyo Heshiiskii 17-ka Sebteembar ee ay wada gaareen Dawladda Federaalka Soomaaliya iyo Dawladaha Xubnaha ka ah, ayna meel mariyeen Labada Aqal ee Baarlamaanka”.

Maxamed C/llaahi Farmaajo ayaa ugu baaqay dhammaan dadka Soomaaliyeed in ay doorkooda ka qaataan xasilloonida amni iyo siyaasadeed ee dalka, iyada oo dhabbaha loo xaarayo dhaqan-gelinta Heshiiska doorashooyinka iyo talo soojeedintii Guddiga Farsamada Doorashada Federaal ee ka soo baxday Shirkii Baydhabo.