Netanyahu oo noqday hogaamiyihii ugu horeeyay Ee lagu casumo Aqalka-Cad

Ra’iisul Wasaaraha Israel Benjamin Netanyahu ayaa lagu casuumay Aqalka Cad, halkaas oo uu kula kulmi doono Madaxweynaha Mareykanka Donald Trump 4-ta Febraayo, sida uu Talaadadii shaaciyey xafiiska ra’iisul wasaaraha Israel.

“Ra’iisul Wasaare Netanyahu waa hoggaamiyihii ugu horreeyay ee ajnabi ah ee lagu casuumo Aqalka Cad xilliga labaad ee Madaxweyne Trump,” ayaa lagu yiri bayaan rasmi ah.

Mas’uul ka tirsan Aqalka Cad ayaa xaqiijiyay in casuumaad rasmi ah loo fidiyay Netanyahu si uu kulanka ugu yimaado “horraanta toddobaadka soo socda.”

“Faahfaahinta taariikhda iyo waqtiga kulanka waxaa lagu dhawaaqi doonaa marka la dhammeystiro,” ayuu yiri mas’uulka.

Kulanka Trump iyo Netanyahu ayaa imaanaya xilli madaxweynaha Mareykanka uu marar badan ku faanay doorkiisa ku aaddan xabad-joojinta Israel iyo Xamaas ee Gaza, taas oo la gaaray kaddib bilo wadahadallo aan midho dhalin.

Markii heshiiska xabad-joojinta uu dhaqan galay, Trump wuxuu xoojiyay qorshe uu ku sheegay “in lagu nadiifinayo” Marinka Gaza, isagoo ku baaqay in Falastiiniyiintu u guuraan dalalka deriska la ah sida Masar iyo Urdun.

Qorshahan ayaa si adag looga hor yimid, gaar ahaan dowladaha Masar, Urdun iyo qaar ka mid ah dowladaha Yurub oo si cad u diiday arrintan.

Xiriirka Trump iyo Netanyahu
Xilligii uu xafiiska joogay muddo xileedkiisa koowaad, Trump wuxuu si joogto ah u sheegayey in Israel “aanay weligeed helin saaxiib uga wanaagsan Aqalka Cad,” aragtidan oo uu Netanyahu marar badan ku celceliyay.

Si kastaba ha ahaatee, xiriirka Trump iyo Netanyahu ayaa si kooban u xumaaday markii hoggaamiyaha Israel uu ugu hambalyeeyay Joe Biden guushii uu ka gaaray doorashadii 2020.

Trump, oo sheegay inuu ku guuleystay doorashada 2020, ayaa Netanyahu ku eedeeyay khiyaano, sida ay xilligaas weriyeen warbaahin kala duwan.

Si kastaba ha ahaatee, Trump ayaa markii uu dib ugu laabtay xafiiska, waxaa lagu warramay inuu durba uu ansixiyay shixnad bambooyin miisaankoodu yahay 2,000 oo pound midkiiba, kuwaas oo horey ay xukuumaddii Biden u hakisay in la geeyo Israel.

Netanyahu ayaa si weyn u ammaanay Trump, isagoo sheegay in Mareykanku siiyay Israel “qalabkii ay isku difaaci lahayd.”.

Xigasho:-VOA