Shaqaaqadii Xarfo oo laga gaaray Xal rasmi ah

Xarfo: December 29, 2024: Shalay oo taariikhdu ahayd December 28, 2024, waxaa guriga Suldaan Maxamed Suldaan Maxamuud ee Degmada Xarfo ka furmay wajiga 2-aad ee shirka dib u heshiisiinta labadaba beelood ee isku dhacu ku dhexmartay Degmada Xarfo ee Gobolka Mudug December 22, 2024.

Shirkaan oo ahaa maanta mid si toos ah loo guda galay, ayaa waxay nabaddoonnada iyo guddiga labada jifo ee Maxamed Cumar iyo Reer Mahad ku heshiiyeen:-

1. Waxay Jifida Maxamed Cumar ka garaabeen, raalligelin iyo soo hoyasho tolnimana ka bixiyeen dhacdadii foosha xumayd ee Xarfo ka dhacday. Waxay caddeeyeen inay beel ahaan hagaajinayaan Ceelkii waxyeeladu soogaartay ee Degmada Xarfo.

2. Waxay labada jifo (Maxamed Cumar iyo Reer Mahad), ku heshiiyeen in berri laga bilaabo iyagoo wada jira ciidamadii iyo maleeshiyadii Xarfo gurmad ahaanta ku soo galay lakala diro oo deegaamadoodii lagu celiyo.

3. In wixii dhib ahaa ee dhacay (dhiig iyo dhaawac) laga wada hadlo, lagana heshiiyo.

4. Arrinta Qabooley waxay labada Jifo ee Maxamed Cumar iyo Reer Mahad (Cumar Maxamuud), Isimada iyo Dawladduba isla qaateen in la raaco guddoonkii Islaan Bashiir Islaan Cabdulle ee horey looga gaaray arrimaha Qaboobey, loona fuliyo guddoonkaas si deg deg ah.

Ugu dambayntii Maamulka Gobilka Mudug wuxuu u mahadcelinaysaa cidkasta oo ka qayb-qaadatay nabadeynta beelaha walaaha ah ee xurguftu ku dhexmartay Degmada Xarfo ee Gobolka Mudug, kuwaas oo ay ugu horeyaan Wasiiradii uu Hogaaminayay Wasiirka wasaarada Arimaha Gudaha, Isimada dhaqanka , Xubnaha Golaha Wasiirada iyo Golaha baarlamaanka Puntland, Degmada Xarfo, ciidamada amaanka, guddigii Cuqaasha iyo samadoonada ahaa ee hawshaan ku jiray iyo Nabaddoonadii ka yimi Gobolada kale ee Puntland, gaar ahaan Gobolka Nugaal.