Shirweynaha Maal-gashiga Puntland oo berri furmaya iyo Wafuud ku qul-qulaysa Garoowe

Shirweynaha Maalgashiga Puntland ayaa berri ka furmi doona Magaalada Garoowe ee Casimadda Puntland, Iyadoona haatan ay socoto Qaban-qaabadii ugu dambeysay ee loogu jiro qabsoomida Shirkan oo horey uu u iclaamiyay Madaxweynaha Dowladda Puntland Mudane  Siciid C/llaahi Deni.

Shirweynahan oo qabsoomaya (15-17) bishan September, ayaa waxaa kasoo qeyb-galaya Marti gaareysa 700  oo qof, kuwaas oo isugu jira Ganacsato iyo Ergooyin ka socda Shirkaddo Ganacsi iyo Dalalka daneeya Maal-gashiga, sida uu sheegay Wasiirka Wasaaradda Kalluumeysiga iyo Kheyraadka Badda Dowladda Puntland Faarax Maxamuud Cawaash.

Wafuud isugu jirta Ganacsato iyo Egooyin caalami ah ayaa saacadihii lasoo dhaafay kusoo qul-qulaysay Magaalada Garoowe ee caasimadda Dowladda Puntland, Iyadoona Goo-dhaw la filayo inay Garoowe soo gaaraan Madax heer sare ah.

Shirkan Maal-gashiga Puntland ayaa inta uu socdo lagu soo bandhigi doonaa Fursadaha Maal-gashi ee ka jira Mandiqada Puntland iyo Kheyraadka Eebbe ku maneystay, waxaana barbar socon doona Shirar gaar gaar ah ay yeelanayaan Ganacsatada iyo Ergooyinka ka qeyb-galaysa Shirweynahan.