Waa inaan wax iska waydiinno shacabka Soomaaliyeed ee ku dhex nool gudaha dalka Jamhuuriyadda Soomaaliya ma waxay ku sugan yihiin intooda badan xaalad u dhaxaysa “Geeri iyo Gaajo” oo ay keeneen caqabadihii ka dhashay muddada dalku soo ahaa dawlad la’aanta jirta iyo codaadda dheeraatay taasoo iyana kumanaan shacab ah barakisay.
MACNAHA NABAD IYO NOLOL!
Xaggee ka yimaadeen erayada maanta dowladdu ku weerarisay dhagaha dadweynaha ee Nabad iyo Nolol?
Erayadaan waxaa Afka qalaad lagu yiraahdaa “Peace and Life”, xaqiiqada dhabta ah waxaa weeye inay la macno yihiin Geeri iyo Gaajo ) ama (Death and Hunger) xaaladdani ay shacabku ku jiraan waa in warbaahinta Madaxabanaan iyo dadka aqoonta leh ay si Soomaalinimo ah xaqiiqada jirta ugu caddeeyaan.
Taariikhda Soomaaliya marnaba shacabka ma aynaan helin nooc hoggaan oo leh aragti siyaasadeed iyo mid waddaninimo oo isku dheelitiran lehna sife daacadnimo iyo mid awood oo guuleysata lana dareemi karo.
Haddaan iswaydiinno shacabka Soomaaliyeed ma waxay ku sugan yihiin marxaladda madaxtooyada ugu magac dartay Nabad iyo Nolol mise waxay ku jiraan Marxalad u dhaxaysa Geeri iyo Gaajo labadani aragti tee xaqiiqda u dhow in umaddu ku sugan tahay?!.
Inta badan madaxda ku guuleysata hoggaanka Soomaaliya kursiga Madaxweynaha, Raysal wasaaraha iyo Guddoomiyaha baarlamaanka waa kuwa iska illowsiiya ballan qaadka ay sameynayaan marka ay ku jiraan ololaha guushooda ka hor.
Arrinkani waxaa sabab u ah in uusan jirin xisaabtan ka yimaada bulshada ay madaxda u yihiin, waayo dadka ayay u kala qeybiyaan qeyb isaga xigta iyo qeyb aan isaga u xisaabsaneyn(Masuul kasta qaabka beeleed oo uu ku yimid, ayuu ugu adeegaa bulshada)!
Waxaan falanqeyntani ku soo gabagabeynayaa marxaladda shacabka Soomaaliyeed ku sugan yihiin waa kuwa aad u adag tusaale amni darrada ayaa u horreysa waa tii maalin cad in ka badan 500 oo qof ay ku dhinteen Isgoyska Zoobe ee Muqdisho, adeegyo dowladeed oo shacabku heysan, caafimaad la’aan, waxbarasho la’aan oo ay sii dheer tahay xasarad siyaasadeed oo dalku uusan marnaba ka bixin muddada burburkani lagu guda jiray.
Raja kasta oo u soo bidhaanta shacabkani daalan waxaa halakeeya khilaafyo siyaasadeed iyo isjiid-jiid soo banbaxa wax yar uun kaddib marka la isyiraahdo mustaqbal wanaagsan baa soo iftiimaya.
Allaha dhibka ka saaro Soomaaliya, balse madaxda dalku waa inay la yimaadaan tallaabooyin ka run sheegeya rajo fiican oo leh mustaqbal guuleysta.
Danjire Mohamed Caalim
caalim68@hotmail.com
Share this:
Discover more from Idil News
Subscribe to get the latest posts sent to your email.