Wakiilka cusub Ee Midowga Afrika uga hawlgalaya Oo..

Ergayga Gaarka ah ee Midowga Africa ee Somaliya, ahna madaxa howlgalka KMG ah ATMIS, Danjire Mohammed El-Amine Souef ayaa soo gaaray magaalada Muqdisho ‘si uu ula wareego howlihiisa’, sida lagu sheegay bayaan kasoo baxay ATMIS.

Danjire Mohammed El-Amine Souef oo u dhashay waddanka Comoros ayaa waxaa xilkan bishii September u magacaabay Guddoomiyaha Guddiga Midowga Afrika Moussa Faki Mahamat.

Waxaa Muqdisho kusoo dhaweeyay Fiona Lortan oo ah ku xigeenka Ergayga Gaarka ah, madax ka tirsan wasaarada arrimaha dibadda ee Soomaaliya iyo saraakiil ka tirsan ciidmada midowga Afrika ee ATMIS.

Wixii ka horreeyay magacaabistiisa, wuxuu Ambassador Souef ahaa Madaxa Xafiiska Gobolka Gao ee Hawlgalka Xasilinta Isku-dhafka ee Qaramada Midoobay ee Mali (MINUSMA).

Danjire @souefmo_elamine, wakiilka Gaarka ah ee Guddoomiyaha Golaha @_AfricanUnion ee dhawaan la soo magacaabay ayaa soo gaaray magaalada #Muqdishu si uu ula wareego howlahiisa shaqo ee Maxdaxa #ATMIS. Faafaahin dheeri ah oo ku saabsan imaanshiyahiisa kaga boqo muuqaalkan hoose. pic.twitter.com/aFNM7qZI8v

— ATMIS (@ATMIS_Somalia) November 20, 2022

Wasiirkii hore ee Arrimaha Dibadda iyo Iskaashiga Caalamiga ee Comoros, Danjire Souef ayaa sidoo kale soo noqday Madaxa Xafiiska Gobolka ee Howlgalka Isku-dhafka ah ee Midowga Afrika iyo Qaramada Midoobay ee Darfur (UNAMID).

Danjire Mohammed El-Amine Souef,ayaa bedelay wakiikii hore ee Midowga Afrika ee Soomaaliya Ambassador Francisco Madeira, oo uu Ra’isul Wasaarihii hore ee Soomaaliya Maxamed Xuseyn Rooble dalka ka eryay bishii April, isaga oo ku eedeeyay ‘inuu ku lug yeeshay arrimo ka baxsan shaqadiisa.’