Warbixintii ugu danbaysay dagaalka hawlgalka argagixisada

Dowladda Puntland,ayaa Saaka shaacisay warbixin kooban oo ku saabsan khasaaraha Argagixisada lagu gaarsiiyay hawlgal xooggan oo ka socda Buuraleyda Calmiskaad ee Gobolka Bari.

Taliska Ciidamada difaaca Puntland ayaa si rasmi ah u shaaciyay warbixin sawirro iyo muuqaallo wadata oo ku saabsan khasaaraha Argagixisada lagu gaarsiiyay hawlgal ciidan ee ka socda buuraha Calmiskaad gaar ahaanna degaannada hoosyimaada degmada Bilidhidin ee gobolka Bari.

Taliska Ciidamada difaaca dowladda Puntland ayaa warbixintooda ku sheegay in hawlgalka lagu gubay Talisyadii Argagixisadu ku lahayd buuraha Calmiskaad”Ciidanka Hawlgalka ciribtirka Argagixisada ayaa gubay talisyo Argagixisada Daacish ku lahayd buuralayda Cal-miskaad,” ayaa lagu yiri Warbixinta kooban ee ka soo baxday Taliska Ciidanka difaaca Puntland.

Ciidamada Puntland ayaa sidoo kale sheegay in ay go’doomiyeen oo jiho kasta ka fadhiyaan Taliskii ugu weynaa Argagixisada Daacish ee buuraha Calmiskaad”sidoo kale waxay Ciidanku ka hawlgelayaan oo jiha kasta ka joogaan God talis weyn ah oo ay ku jirto Argagixisadu.”